Ek pittu si love story

Sangeet ke saath suron se pehle aur church ke saath ghatak apraadho se pehle, saath ank ki ehmiyat humaari zindagi mein kuch aur thi. Saath Goti, jise kahin pittu to kahin lagori kehte hai. Ek aisa khel jo pyaar se khelo to dilon ko jodta hai. Aur kaminepan se khelo to baaki sab todta hai. Niyam bahut hi saral hai. Saath pattharo ko ek ke upar ek rakhte hai. Phhir do teams mein sab ko baant diya jaata hai. Ek team ka kaam hai gotiyon ki imaarat ko todna, aur phhir wapas se jodna. Doosri team ka kaam hai aisa karne se unhe rokna.

Bablu ki team mein do log kam pad gaye the. Par Bablu ko yakeen tha ki jeet uski team ki hi hogi. Uski didi Babli tabhi ek saheli ke saath maidaan mein aayi. Bablu ki nazre uss saheli par teeki reh gayi. Woh aa ke boli “Namaste, humaara naam Chatori hai”. Sunn ke sab has pade. Chatori naam pehli baar suna tha sab ne. Bas Bablu tha jisey hansi nahin aayi. Par uska dil muskura raha tha. Bageeche mein naya phhool aaya tha. Jise dekh saare gulaab murjha gaye, aur suryamukhi sooraj ko chhod usey ghoorne laga. Chatori ne haath aage badhaya to Bablu ne uske gaal kheench diye. Aadat se majboor tha bechaara. Ladki ke gaal dekh kar kaboo kho baithta tha.

Chatori bhadak gayi “yeh kya tareeka hai. ladki se milne ki tameez nahin tumko?” Bablu thoda ghabra sa gaya. Bola “bas check kar rahein the aap ladki ho ki pari”.

Mohabbat bhi kamaal kar jaati hai.

Gawaaron ko shayar bana jaati hai.

Bablu aur uski team ka kaam tha gotiyon ki imaarat ko todna. Bablu ne gotiyon par taktaki lagayi aur gend se de maara. Taash ke mehal jaisi woh imaarat toot ke giri. Doosre team ke sardar Shonty ne gend ko jhat se pakad liya. Abb Bablu ki team ka kaam tha uss imaarat ko waapas banana. Aur Shonty ki team ka kaam tha gend se Bablu ki team ke aathon khiladiyon ko chitt karna.

Do saal ke career mein Bablu ki ekagrata ko bhang kisi ne nahin kiya tha. Par jab se uski aankho ne Chatori ko dekha, aankho ki goti bhi dil ban gaye the. “Abbey bablu ladki taadna bandh kar, goti saja”, uske ek dost ne cheenkha. Bablu bhaagta huwa gotiyon ke paas pahuncha ki tabhi kisi ki cheenkh ne phhir uska dhyaan ko toda. Chatori phisal kar giri padi thi, uske paanv mein chot lagi thi. Shonty gend liye uski aur daud raha tha. Shonty uske saamne pahuncha, nishana lagaya, tabhi kisi ne use zor ka dhakka maara aur uska nishana chukk gaya. Bablu ke iss prahar ne Shonty aur krodhit kar diya tha. Bablu ne Chatori ko utha kar bhaagna shuru kiya.

Bablu – “Mera haath pakde raho, amma kasam kuch hone nahin denge tumko”

Chatori ke kamzor haatho ne jaise hi Bablu ke haath ko thaama ek ajeeb si  taakat uski rago mein daudne lag gayi. Uske dimaag mein ek plan aaya.

Chatori – “Suno Bablu, tum kaptaan ho, sab tum hi ko naapenge. Tum gotiyon se durr bhaagte raho, hum gotiyaan sajayenge”

Bablu ko yeh yojna pasand aayi. Dil par patthar rakhkar usne haath chhoda. Shonty ne nishana Bablu par tikaaya aur zor se maara. Par Bablu iss raftaar se bhaag raha tha ki gend to kya cheetah bhi usey na pakad paata. Shonty ki poore team ka dhyan Bablu ke upar tha. Par tabhi Shonty ne sab se ka “Iske team members ko pehle niptaate hain. Isko aakhir mein niptaayenge”

Chatori ne yojna ke mutaabik gotiyan sajaana shuru kar di thi. Woh ek goti sajaati phir jhaadiyon ke peeche chhup jaati. Dekhte hi dekhte chaar goti laga chuki thi. Par Bablu ki team mein abb bas teen log baaki the. Babli, Bablu aur Chatori. Baaki sab nipat chuke the. Shonty ka dhyan gotiyon ki aur gaya. Usey samajh nahin aa raha tha ki saja kaun raha hai. Sab to uski aankhon ke saamne the. Sab…… nahin tabhi usey yaad aaya Chatori bhi to baaki hai jo kahin dikh nahin rahi hai. Usne cheekha “Chatori ko dhundo”. Kisi ne aawaz lagayi “shayad jhaadiyon ke peeche hogi”.

Shonty dabey paanv jhaadiyon ki aur jaane laga. Uske badhte kadam dekh Bablu ki dhadkane badhne lagi

Bablu – abbey o ladki ke peeche kya bhaag raha hai. Hunar hai to mere ko maar ke dikha.

Shonty ne uske taraf dekh ke muskuraaya aur waapas jhadiyon ki aur jaane laga. Barah saal ki umar mein woh ek prem kahaani ka khalnayak bann chukka tha. Iss baat ka usey ehsaas bhi nahin tha. Par Babli ko iss panapte pyaar ka ehsaas ho gaya tha. Ek behan se yeh baat kaise chupti. Woh daud ke gotiyaan sajaane lagi. Shonty ki nazre uski taraf gayi. Woh jhaadiyon ko chhod Babli ke taraf bhaag ke aaya aur usey gend se de maara.

Abb bas Bablu aur Chatori bache the. Bablu ko apni behan ke iss qurbaani ka ehsaas tha.

Bablu – “apki qurbaani vyarth nahin jaane denge”

Babli – khel aur Chatori, dono ko jeet ke aana.

Bablu mein maano ek alag jazba pravesh kar gaya tha. Bas do gotiyan sajaana baaki tha. Bablu aur chatori maidaan ke vipreet hisson mein the. Taaki Shonty ki team ke liye unhe pakadna aasaan na ho. Shonty ne socha pehle Chatori ko maarte hain, phhir Bablu ko maarenge. Woh jaise hi Chatori ko maarne gaya. Bablu ne bhaagte huye ek goti rakh di. Abb bas ek aur goti ko rakhna baaki tha.

Shonty ko samajh mein aaya ki pehle Bablu ko hi maarna hoga. Usne apni poori team ko Bablu ko gherne ko kaha. Abhimanyu ki tarah Bablu abb ek chakraviyuh mein phas chukka tha. Uska haarna nishchit tha. Chatori gotiyon se kaafi durr thi. Usey aur waqt chahiye tha. Tabhi Bablu ke dimaag mein ek plan aaya. Woh zameen pe baith gaya. Shonty ka gurror to jaise saatve aasmaan par tha. Dushman ko ghutne tekta dekh uska hriday prasannata se bhar gaya. Usne gend li aur bilkul Bablu ke saamne chala gaya.

Babli durr khadi dekh rahi thi. Apne bhaai ke iss vyavhar se uske aankho mein krodh bhar gaya tha. Haarna alag baat hai aur ghutne tekna alag baat. Chatori ko bhi samajh nahin aaya ki kya ho raha tha. Woh dheere dheere gotiyon ki aur badh rahi thi.

Shonty Bablu ke bilkul saamna khada ho gaya phir pyaar se gend ko uske sar par giyara. Gend Bablu ke sar par ek tappa kha ke phir zameen par gir gayi. Bablu toorant gend ke upar laet gaya. Aur poori taakat se cheekha “Oye Chatori saja de goti”

Babli ko abb plan samajh mein aaya. Bablu ki poore team jo maidan ke bahar baithi thi cheekhne lagi “bhaag Chatori bhaag.”

Chatori poore zor se gotiyon ki aur bhagi. Shonty poori taakat se Bablu ko gend ke upar se hataane ki koshish karne laga. Jab usse nahin huwa to bola “maaro saale ko”. Sab mil ke Bablu ko maarne lage. Par Bablu tass-se-mass na huwa.

Musladhaar barish ki tarah Shonty ki team uss par laatein barsa raha tha. Honth phhat chukka tha. Kaan se khoon nikal raha tha. Par Bablu ek inch bhi nahin hila. Uski aankhe Chatori par tiki hui thi. Chatori langra rahi thi. Phisal ke girne se uske paanv mein chot lagi thi. Par ussey Bablu ki yeh haalat dekhi nahin jaa rahi thi. Ek taang par daudte huye gotiyon ke paas pahunchi. Phhir woh Shonty ki aur dekhte huye cheenkhi “Oye Shonty, bablu ko maarne mein jinta tera paseena baha hai na, abb usi paseene mein doob mar”. Yeh keh ke ussne aakhri goti ko baaki chayye gotiyon ke upar rakh diya.

Shonty zor se cheekha phir sharam se maidan chhod ke bhaag gaya. Bablu ki poori team bhaagte huye Bablu ke paas pahunchi aur usey uthaya. Babli ke kandho ka sahara leta huwa woh utha. Chatori bhaagte huye aayi aur usey gale laga liya. Boli “tumko bahut chot lagi hai, chalo doctor ke paas”. Bablu bola “tumko dekh ke aaj dil bhar gaya hai, kal tak zakhm bhi bhar jaayega”.

Saath gotiyon ne saath janmo ka rishta bana diya tha.

Mohabbat ne bachhon ko jawaan bana diya tha.  

Advertisements

One thought on “Ek pittu si love story

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s